خواطر في يوم ميلادي

تـــــحد يث

الساعة دلوقتي 2 بالليل اخيرا اتصلح الكمبيوتر بعد عشر ايام بوظان

متأسف جدا لتاخري في الردود وهرد في اسرع وقت وهزوركم كمان في مدونتكم ان شاء الله

بالذات امولا لازم انتقم منك D:

واحب اطمن جميع المواطنين اننا مع الغلابة محدودي الدخل

بس الغلابة هما اللي مش فاهميننا وظالميننا

بس ياللا مش مهم اهم حاجة مصلحة الوطن

D:

ادعوا بقي ان الكمبيوتر يفضل كويس لانه كان اتصلح ساعة كده وباظ تاني

وغيرت الهارد كفاية اوي عليا كده عشان مصاريفي كترت اوي اليومين دول

D:

الوقت بيجري بسرعة جدا وبتمر بينا الأيام .....السنة اللي عدت عليا دي كانت سنة من اهم سنين حياتي وفيها احداث

كتيرة أوي

وجوايا حاجات كتير أوي بس انا مش مرتب انا هكتب ايه انا اللي هييجي من قلبي ع الكيبورد هكتبه مباشرة حتي لو مش بترتيب الاحداث

انا دلوقتي مضايق شوية لاني طالعلي قرار نقل من شغلي لمكان تاني رغم اني بشهادة الجميع انجح الأطباء علي الأطلاق في مكان عملي

ورحت وتظلمت بس يبدو ان مفيش فايدة.....انا بس صعبان عليا النجاح اللي عملته لاني بقالي سنة ونص في مكاني ده

تاني حاجة جوايا عمي اللي عايش في المانيا ويصارع المرض وحيدا ويبدو كده اننا مش هنشوفه تاني وكم الحزن جوايا بسبب الموضوع

ده مضايقني جدا جدا بس ربنا يكرمنا ويتم شفائه وربنا قادر علي كل شئ

واللا أمي اللي ايديها اتكسرت كسر مضاعف ولسه في الجبس من نص رمضان تقريبا......معلش يا جماعة استحملوني هيا الاحداث تبدو

حزينة بس متقلقوش عليا ولما بفكر فيها من زاوية تانية بتبقي جميلة يعني الحمد لله ان الموضوع وقف علي كسر ايد لانه كان ممكن يكون

أكبر بس لطف ربنا ....وقرار نقلي ان شاء الله خير احنا بس طبيعتنا البشرية بتحزن لكن راضيين ان شاء الله

حاجة كمان جت علي بالي دلوقتي........هو أنا كنت قفلت المدونة ليه؟؟؟

لما أكون مستأمن حد علي حاجة شخصية وأكون مأكد عليه ان الكلام ده محدش يعرفه وأتفاجئ ان في ناس عارفاه

حاجة يعني صباح الأمانة وصباح حفظ السر.......ومع ذلك ربنا يعلم اني مزعلتش منه بل بالعكس دعوت الله له كثيرا

بس جالي حالة من القرف من المدونة والتدوين.....والحمد لله الواحد يمكن لما اتغسل بعد رمضان رجعت تاني ولله الحمد

الحاجة الجميلة اللي جدت في حياتي ......لا دي عايزة فاصل بقي

==================================

في اول ليلة من رمضان يعني قبل رمضان ما يبدأ بدأت اولي الخطوات الجدية لاني أخطب :) وتعمدت ان الموضوع يكون في رمضان

لان رمضان دا شهر بركة وخير ويبقي بداية نواة البيت المسلم نشكلها في رمضان فكانت فرصة جميلة

والموضوع تم والحمد لله وخطيبتي من حفظة القران الكريم وبعتبرها نعمة من ربنا عليا وممكن نبقي نتكلم عن الموضوع ده بالتفصيل بعدين

ان شاء الله

بقول ايه كفاية اوي كدة لحسن انا طولت اوي وبعدين خلي الختام بموضوع الخطوبة عشان يبقي ختامه مسك

بالمناسبة انا كده 26 سنة بالتمام والكمال وكل سنة وانتم كلكم طيبين والي الله اقرب وعلي طاعته أدوم

وانا مش زعلان من اي حد ومسامح اي حد وياريت لو حد زعلان مني في حاجة يعرفني وشكراااااا