حبيبك يبلع لك الزلط

زعلت من شخص عزيز عليا جدا.....ولما الواحد بيكون بيحب حد بيقوله علي طول ايه اللي مزعله عشان ميبقاش في حاجة انا شايلها من ناحيته .....وده في رأيي الصح لانه ممكن يوضحلي وجهة نظره والغلطان يعتذر للتاني وينتهي الموضوع ونسامح ونلتمس لبعض الاعذار أما اني مش اقوله واخلي فرصة للشيطان يزود الموضوع جوايا ...ده بيزود المشكلة مش بيحلها

بس انا جيت مرة ومقولتش اني زعلان ....بس بالافعال كده بينت من بعيد لبعيد اني مش بتعامل بطبيعتي بس دا كان لسبب جوايا.....يا تري الشخص العزيز جدا عليا ده هيحس اني زعلان ولا الدنيا لما بتاخدنا عادي مش بنفرق بين رد الفعل النابع من تلقائية وحب أواني متغير شوية

فرحت جدا ان الشخص دا حس بغلطه من نفسه وهو اللي فتح الموضوع وابدي اعتذاره.....والمسألة بالنسبة لي مش مسألة اعتذار علي قد ما هيا حب وعشم .....وان كان معظم المواقف زي ما قلت اننا لازم نفاتح اللي بنحبهم مباشرة بدون لف ودوران

وبردو لو لينا ملاحظة علي احبائنا لازم نختار الاسلوب الامثل والوقت المناسب وطبعا النصيحة علي الملأ فضيحة....وعلينا ان نقدم النصيحة علي احسن وجه ونقبلها علي اي وجه

ولو في رصيد من الحب في القلب بيغفر وبيسامح علي طول وزي ما قيل في الامثال حبيبك يبلعلك الزلط :) وعدوك يتمنالك الغلط.........لان رصيد الحب ده بيخلينا نقول معلش دا هو انسان كويس دي اول مرة يغلط كدة مثلا مثلا يعني عكس ما يكون واحد ميعرفكش وتيجي تغلط مثلا في اي حاجة لان مفيش رصيد من الحب والمعرفة ياخد عنك فكرة غلط