رمضان الصلح

كل عام وأنتم بخير.....

يارب يكون رمضان الصلح مع القران...احنا للأسف اللي بنخاصمه

يكون رمضان التغيير من أحوالنا للأحسن...ونكون أقرب لربنا سبحانه وتعالي

المــــواطـــــن رخــــيـــــص

خبر يحرق الدم .....أن مديرة مستشفي رفضت استقبال مريضة كانت درجة حرارتها عالية وماتت المريضة ..وعاقبوا المديرة بنقلها...انا طبعا ضد اللي عملته المديرة ...بس اللي نرفزني اكتر ان الناس دي اقصد المسئولين اللي اكبر من المديرة دي بيستخفوا بعقول الناس...وهو اساسا القرار بتاع ال 500 جنيه اللي بسببه المديرة رفضت دخول المريضة مين اللي مطلعه...ويا تري دي حاجة عندها بس ... لا ابدا دا معظم المستشفيات كدة دلوقتي ...يقولك دا علاج اقتصادي حتي حاجات طوارئ مينفعش يتاخد فيها فلوس ...واحد رجله اتكسرت ف الشارع فجأة جابوه ع المستشفي يدفع بردو واحد اتجرح يدفع بردو....ولادة ف مستشفي حكومي عملولها تسعيرة للطبيعي والقيصري....انا كنت نبطشي استقبال بمستشفي للأطفال...جالي طفل لسه مولود يعاني صعوبة من التنفس...بعد تقييم حالته وجدنا انه لازم يتحط علي جهاز تنفس صناعي في اسرع مايمكن....المستشفي فيها جناحين جناح مجاني وجناح بفلوس...سألنا القسم المجاني عندكم مجان يا جماعة قالوا لأ....قلنا لأهل الطفل روحوا اسألوا في مستشفي كذا او كذا الحكومية بردة يمكن تلاقوا والطفل معانا بنسعفه ف الاستقبال ...الاسعافات الأولية ...وطبعا قلنا كده بعد ما عرفنا انهم مش هيقدروا علي تمن القسم الاقتصادي ابو فلوس برغم من توافر مكان.....وبعد ما لفوا علي كذا مستشفي رجعولنا مفيش اماكن....الأم قعدت تتحايل ع الادارة انها تدفع اللي معاها يقولولها الف جنيه يعني الف جنيه...تقولهم طيب خدوا الغويشة اللي ف ايدي علي ما اروح اتصرف...وطبعا ما ينفعش....والموظف بينفذ تعليمات المدير والمدير بينفذ تعليمات اللي اكبر منه يعني دي مش تعليماته.....واوعوا تفتكروا يا جماعة ان دي حالة فردية دي بشوفها كتيييييييييييير...يعني الله يكون ف عون الناس الغلابة اللي ادني ادني حقوقها ف الحياة مش عارفين ياخدوه.....يعني كله الا الصحة.....وبعيدا عن الحكومة بوصي كل انسان مقتدر انه ينفق في مجال العلاج للناس الغلابة....يعني يساهم في شراء اجهزة طبية....حضانات....ادوية...عمليات....يعني كل واحد بقدر استطاعته والله الموفق والله المعين وحسبي الله ونعم الوكيل

16/5/2009

الحمد لله رب العالمين....رزقني ببنوتة جميلة...وكان يوم ولادتها من أجمل أيام حياتي..برغم الصعوبات المعتادة للأمهات..بجد الله يكون في عون أي أم بتولد...بس ياللا علقة تفوت ولا حد يموت :)..وتسمع بقي الكلمة المعتادة ياللا عشان تعرفوا احنا تعبنا فيكم قد ايه..طبعا دا شئ بالفطرة ان الواحد بيفرح بالذرية وأنه يكون أب بس طبعا لابد من تجميع جميع النيات الصالحة اللي ترضي ربنا..والاستعداد لهذه المهمة اننا نكون الأسرة المسلمة الصحيحة اللازمة لاقامة المجتمع المسلم وما المجتمع الا افراد صالحين...وعشان حتي بعد موت اي انسان يكون سايب اولاد صالحين كل ما يعملوا اي عمل يكون في ميزان حسناته...ويا سلام لما نربي اولادنا علي نصرة الاسلام وفعلا يكونوا جيل احسن من اللي قبله باذن الله يكون في ميزان حسنات اللي تولي تربية هذا النشء....ربنا يرزق جميع المسلمين بالذرية الصالحة ويسعد كل واحد بأولاده.

اه صحيح انا مقولتش انا سميتها ايه..........انها حبيبة قلبي......نـــــــــــــاديـــــة

سلام الله عليكم

أسباب كتيرة خلتني اجي علي صفحة البلوجر الخاصة بيا وأقول ياللا نديها تدوينة بدون اي تحضير لحاجة معينة

الاسباب دي منها اني زهقت من شكل الصفحة بتاعت مدونتي :) كلمة روح ع الشات بوكس مفيش بوست يوحد الله :)

وكمان لما باجي أقرا تدويناتي القديمة بكون مندمج أوي وانا بسترجع الذكريات فــ ليه لأ....ان الواحد يدون ولو يدون لنفسه حتي.


يا تري في ايه جوايا؟؟ اهم حاجة جوايا حاليا ع المستوي الشخصي اني منتظر أكون أب لبنوتة كما هو متوقع ان شاء الله

من دلوقتي بحاول أكون اب كويس بشوف ايه اصلحه ف نفسي عشان ابقي قدوة كويسة لذرية صالحة باذن الله

وخلاص بقينا اهو في الساعات الأولي من صباح يوم 13 مايو ومازلت انتظر هذه اللحظة .....أدعولي بالله عليكم
**************


تاني حاجة اني الشغل واخدني جدا لاني بدرس وبحضر الزمالة في طب الاطفال وحديثي الولادة والنبطشيات مع العيادة

واخدة وقتي جدا وبلاقي وقت اذاكر بالعااااااااافية.....بس هو تحدي أني أكون متميز ....العملية بس عايزة حسن استخدام

للوقت وترتيب الاولويات
****************

اقول ايه بقي بالنسبة لما يدور ع الساحة.....اه موضوع انفلونزا الخنازير ده اتمني من الحكومة انها تتعامل بمنتهي

الصرامة والحزم لأن الموضوع ده لو تحول لوباء ف مصر هتبقي كارثة احنا مش قدها....واحنا بلد مسلمة يعني

يبقي عيب قوي...يا ريته كان يبقي زي انفلونزا الطيور كدة من الطيور للانسان بس كان قلنا ف ستين داهية

للي يتعامل مع الخنازير لكن للاسف ان ممكن يتنقل من انسان لانسان وربنا يستر
********************

كنت ف المترو قريت اعلان وزارة الصحة في عربيات المترو للتحذير من الانفلونزا ومن ضمن الارشادات

تجنب الاماكن المزدحمة ....سبحان الله.....وكأنهم بيخضوا اللي متكومين علي بعض ف المترو :)
*********************
الطب في مصر يعاني من أزمة حقيقية ممكن اتكلم عنها بالتفصيل بعدين....لكن بلخصها في ان صحة المواطن

مش من أولويات الحكومة يعني عادي اهي ماشية واللي يموت يموت واللي يمرض يمرض...وبالتالي

الطبيب مش مهم حاليا بالنسبة للحكومة والمرتبات لا توازي ابدا حجم الاهمية والمجهود ...وبالتالي يقل مستوي

الأطباء وندور في حلقة توصلنا للاسف لحالة متدنية من الخدمة الطبية

*********************

ياللا بقي كفاية كدة واهي بداية ان الواحد يرجع للتدوين بعد فترة طويلة من الغياب.....ربنا يوفقكم جميعا

الي ما يحبه ويرضاه وأسألكم الدعاء ....وسلام الله عليكم جميعا

وأعــــــــــــدوا

بمشيئة الله سوف تصمد وحماس وستمطر الكيان الصهيوني بمئات الصواريخ...وسيكون هذا تحولا جديدا في المنطقة بعد التحول الذي أحدثه حزب الله في حرب 2006 واسقاط هيبة الجيش الذي لا يقهر....ووضح جليا ايمان اهل غزة عندما تحدثت أم استشهد اثنين من أبنائها بكل ثبات قائلة ان الله وملائكته معنا ...وأن الرسول قاوم ونحن ايضا نقاوم وأنهم مستعدون لأكل الملح وكن النصر سيكون حليفهم ..وكما قال مشعل ان الأمة ستنتصر عندما علماءها وقادتها لميادين الجهاد ....وهذا كان سببا في ان يتقدم المجاهد العالم نزار ريان قافلة الشهداء


وعلي كل واحد منا ان يقوم بوسعه تجاه القضية الفلسطينية.....ولا احد يعلم متي سيستخدمه الله وما سيكون حجم دوره...فعلي الجميع ان يجهز نفسه بما استطاع من امكانيات تؤهله لخدمة مجتمعه....ومنها ان يتميز كل منا في مجاله لأن التميز هو اللبنه الأساسية تجاه تكوين أمة اسلامية قوية فعالة....وبالطبع الدعاء التبرع زيادة الصلة بالله تعريف الناس بالقضية وفض الشبهات المثارة حول حماس مقاطعة منتجات الأعداء المشاركة في الفعاليات المناصرة لاخواننا في غزة الجهاد بالمال والنصر للاسلام باذن الله


اللهم صلي علي سيدنا محمد

اللهم اشف صدور قوم مؤمنين

اللهم واجعل صواريخ حماس تضرب اعماق تل أبيب

اللهم زلزل الأرض من تحت أقدام اليهود الغاصبين

اللهم أرنا ايات اسمك المنتقم في اليهود ومن هاودهم

اللهم استعملنا في خدمة دينك ونصرة المسلمين


وصلي اللهم علي سيدنا محمد

فوت علينا بكرة

المصالح الحكومية بقت حاجة تخنق وعشان نخلص ورقة ملهاش لازمة نفضل داخلين خارجين من الادارة دي للادارة دي

وطبعا ادارة اي مكان اخر حاجة في حساباتها هو راحة المواطنين ولا يعنيهم اي تطوير .....يعني ببساطة يا جماعة لا بد من

التنسيق بين الادارات عشان يريحوا الناس بس تقول لمين!!!! دا انا مش عايز اقول ان خلاص بقي شغل الورقة والقلم دا انتهي واستخدام الانترنت والكمبيوتر في الادارات بقي أمر حتمي

.....انا اصلي مفقوع عشان أخلي طرفي من مكان كأني في رحلة كفاح وجهاد!!!!!
=========================================


كـــــل سنة وحضراتكم جميعا بخير وعيد سعيد وياريت كلنا نصوم يوم عرفة فرصه عظيمة نقرب بيها من ربنا

عـــــــــــــودة مصــــــــــراوي....كله يوســـــع

السلام عليكم ورحمة الله وبركاته.....تحياتي لكل الاخوة والاخوات رفقاء عالم التدوين....أتمني ان حد يكون لسه فاكرني....

اربع شهور غياب بسبب جوازي مش بس الجواز بس الكمبيوتر كان فيه مشكلة وانا كنت معتقد انها مشكلة كهربا لدرجة اني جبت

جهاز ستابيليزر وبردو ما اشتغلش والاخر انها طلعت مشكلة بسيطة ف الكمبيوتر وفترة علي ما اشتركت في الدي اس ال....

وف النص طبعا احداث كتيرة منها اني بدأت تخصصي كطبيب أطفال وانتقالي الي مستشفي جديدة....ومرض والدي ووفاة جدتي

وبردو رمضان الوقت فيه بيمر بسرعة.....بعتذر لكل المدونين والمدونات علي عدم المتابعة بس انا فعلا كنت من غير كمبيوتر لفترة طويلة


وبعدين اجي ادخل سايبر الاقي اغلبه شوية مراهقين شغالين games وتهريج بكون محرج فجربتها مرة او اتنين ومكنتش بكمل تلت ساعة

وأقوم اجري بحس اني هتشبه.....بس اخيرا ركبت الدي اس ال وهنطلق ان شاء الله ع الاقل كمتابع جيد ....


والأحدث الجميل الجديد في حياتي .....اني منتظر حاليا مصراوي الصغير فياريت تدعولي ان يرزقني الله الذرية الصالحة

وهجيلكم مدوناتكم قريبا جدا وانتظروا تعليقاتي .....دمتم بخير وسلام الله عليكم جميعا